အ၀ိဇ္ဇာ၊ တဏှာ၊ ဥပါဒါန်တရားတို့ကို သတ္တ၀ါတို့၏ စိတ်အစဉ်ကို ညစ်နွမ်းအောင်ပြုလုပ်တတ်သောကြောင့် ကိလေသာဟုခေါ်၏၊ အ၀ိဇ္ဇာသည် ထိုထိုအာရုံတို့၌ အမှန်အတိုင်းမသိအောင် ဖုံလွှမ်းပေး၏၊ မှောင်ချပေး၏၊ ပညာ မျက်စိ ကန်းအောင်ပြုလုပ်၏၊ ထိုအခါ ထိုထိုအာရုံတို့ကို ခုံခုံမင်မင် လိုချင်တပ်မက်မူ တဏှာဖြစ်လာ၏၊ တဖန် ထိုထိုအာရုံတို့ကို မရလျှင် မနေနိုင်လောက်အောင် အာရုံကိုပြင်းစွာစွဲလမ်းမူဥပါဒါန်ပေါ်လာ၏၊ ထို့ကြောင့် ထိုထိုအာရုံကို ရရာရကြောင်း ကောင်းမကောင်းသော ကုသိုလ်ကံ၊ အကုသိုလ်ကံများကို ပြုလုပ် ကြရသည်၊ ဤသည်မှာ ကိလေသာဝဋ် ကမ္မ၀ဋ်ကိုလည်အောင် လှည့်ပေးခြင်းဖြစ်၏။
ထိုသင်္ခါရ၊ ကမ္မဘ၀ဟူသော ကမ္မ၀ဋ်ကြောင့် ထိုထိုဘုံဘ၀တို့၌ ၀ိပါက်နာမက္ခန္ဓာ ကမ္မဇရုပ်တို့ အမျိုးမျိုးဖြစ်ပေါ်ကြရ၏။ ထိုဖြစ်ပေါ်လာသောဝိပါက် နာမက္ခန္ဓာကမ္မဇရုပ်တို့ကား ၀ိညာဉ်၊ နာမ်ရုပ်၊ သဠာယတန၊ ဖဿ၊ ဝေဒနာ၊ ဥပပတ္တိဘ၀၊ ဇာတိ ဇရာ မရဏဟူသော ၀ိပါက၀ဋ်တည်း။ ဤသို့ ကမ္မ၀ဋ်သည် ၀ိပါက၀ဋ်လည်အောင် လှည့်ပေး၏။
ထို ၀ိညာဉ်၊ နာမ်ရုပ်၊ သဠာယတန၊ ဖဿ၊ ဝေဒနာစသော ၀ိပါက၀ဋ် တရားများဖြစ်လာသည့်အခါ ထိုဝဋ်တရားများတွင် အာရုံကိုတွေ့ထိမူ ဖဿ၊ ခံစားမူ ဝေဒနာ စသည်တို့ကြောင့် အာရုံကိုတပ်မက်မူတဏှာ၊ စွဲလမ်းမူဥပါဒါန်တရားတို့နှင့် အာရုံ၏အမှန်သဘောကို မသိမူ အ၀ိဇ္ဇာဟူသော ကိလေသာတရားတို့ ဖြစ်ပွားလာရပြန်၏၊ ဤသို့ဝိပါက၀ဋ်က တဏှာဥပါဒါန် အ၀ိဇ္ဇာဟူသော ကိလေသ၀ဋ်ကို တဖန်ပြန်၍ လည်စေပေသည်။ ဤသို့အားဖြင့် ကိလေသ၀ဋ်ကြောင့် ကမ္မ၀ဋ်ဖြစ်၊ ကမ္မ၀ဋ်ကြောင့် ၀ိပါက၀ဋ်ဖြစ်၊ ၀ိပါက၀ဋ်ကြောင့် ကိလေသ၀ဋ်ဖြစ်၊ ကိလေသ၀ဋ်ကြောင့် ကမ္မ၀ဋ်ဖြစ် စသည်ဖြင့် ၀ဋ်သုံးပါး မပြတ်မစဲ ထပ်တလဲလဲ လည်ပတ်ဖြစ်နေပေသည်။
ပြည်ထောင်စု မြန်မာနိုင်ငံတော်အစိုးရ သာသနာရေးဝန်ကြီးဌာန ဗုဒ္ဓဘာသာတရားတော် (အဆင့်မြင့်) စာအုပ်မှ ထုတ်နူတ်ဖော်ပြသည်။
Friday, 25 November 2011
ဝဋ်သုံးပါးနည်းအားဖြင့် သံသရာလည်နေပုံ
Subscribe to:
Post Comments (Atom)
No comments:
Post a Comment