မိတ်ဆွေတွေရဲ့ လက်ဖက်ရည်ဝိုင်းမှာ ဘဲဥမ က မေးတယ်။
" ခုခေတ်ကုမ္ပဏီဝန်ထမ်းတွေအတွက် လိုအပ်တဲ့အရည်အချင်းကတော့
တစ်။ ရုပ်ရည်ချောမောရမယ်။
နှစ်။ အိမ်ထောင်မရှိသူ အပျိုဖြစ်ရမယ် ဆိုတာပဲ"
မဲတူက သူထင်ရာ ၀င်ပြောပါတယ်။
" ငါ့အထင်ကတော့ ကံ ၊ဉာဏ်၊၀ီရိယ အရေးကြီးတယ်ထင်တာပဲ"
ကိုကောက်က တွေးတွေးဆဆ ပြောတယ်။
" ဦးကောက်က ဓာတ်ပြားဟောင်းကြီးပဲ " လို့ ကျွဲမ က ဆိုတယ်။
" တကယ်ပြောတာဟ၊ လူက ဘယ်လောက်တော်နေတော်နေ၊
ကိုယ်ကံက မကောင်းလို့ ရာထူးတိုးပေးတော့မဲ့အချိန်မှာ
ကိုယ့်ကို အမြင်စောင်းနေတဲ့ မန်နေဂျာက ကိုယ့်အထက်ရောက်နေရင် ဘူပိတ်မှာဘဲ"
ဆိုပြီး ကိုကောက်က ရှင်းပြတယ်။
" တစ်ခါတစ်လေတော့ ရာထူးတိုးတယ်ဆိုတာ အလုပ်ကြိုးစားလုပ်တာ၊
လူချစ်လူခင်များတာနဲ့ မဆိုင်တာမျိုးလဲ ကြုံဖူးတယ်" လို့ ဘဲဥမ က ပြောပါတယ်။
" လူမုန်းများလို့ ရာထူးတိုးသွားတဲ့ လူတစ်ယောက်အကြောင်း ဟာသပုံပြင်တစ်ပုဒ်
အင်တာနက်ထဲမှာ ငါတွေ့ထားတယ်ကွ"ဆိုပြီး ရွှီး က ဆိုတယ်။
'လူမုန်းများလို့ ရာထူးတိုးတယ်ဆိုတော့ ဘယ်လိုလုပ်ငန်းမျိုးလဲ" ဘဲဥမက စိတ်ဝင်တစားမေးတယ်။
" သိချင်ရင် ငြိမ်ငြိမ်လေး နားထောင်" လို့ လန်ဘားက ပြောပါတယ်။
" ကုမ္ပဏီကြီးတစ်ခုရဲ့ အမှုဆောင်အရာရှိချုပ် က သူ့လက်အောက်အမှုဆောင်တွေကို
သူ့ရဲ့ထည်ဝါခမ်းနားတဲ့အိမ်ကြီးမှာ ဖိတ်ကြားပြီး ဧည့်ခံပွဲ တစ်ခုလုပ်သတဲ့၊
အိမ်ကြီးရဲ့နောက်ဘက်မှာလည်း ရေကူးကန် ကျယ်ကျယ်ကြီးတစ်ခုရှိသတဲ့"
" တော်တော်ချမ်းသာပုံရတယ်"
" ရေကူးကန်ထဲမှာတော့ မိကျောင်းတွေမွေးထားသတဲ့"
" တော်တော်စိတ်ဝင်စားဖို့ကောင်းတဲ့ဝါသနာပဲ"
" အမှုဆောင်အရာရှိချုပ်က သူ့အမှုဆောင်တွေကို မိန့်ခွန်းပြောရာမှာ
အကြီးအကဲလုပ်မယ့်သူဟာ သတ္တိကောင်းဖို့လိုအပ်တယ်။
ကျုပ်ကို ဒီနေရာရောက်အောင် ပို့ဆောင်ပေးခဲ့တာ သတ္တိကြောင့်ပဲ။
ဒီပါတီပွဲကိုတက်ရောက်လာတဲ့လူကြီးမင်းအားလုံးကို
သတ္တိနဲ့ပတ်သက်ပြီး စိန်ခေါ်ချင်တယ်။
မိကျောင်းတွေရှိတဲ့ ဟောဒီရေကူးကန်ထဲကို ဒိုက်ဗင်ထိုးချရဲတဲ့သတ္တိ ဘယ်သူရှိလဲ။
ကန်ထဲဆင်း၊ မိကျောင်းတွေကိုဖြတ်ကျော်ပြီး ဟိုတစ်ဘက်ကိုရောက်အောင်
ကူးခတ်ရဲတဲ့လူမျိုးကို သူ့ဆန္ဒရှိရာ ကိုယ်ပေးမယ်"လို့ပြောတယ်။
" တကယ့်စိန်ခေါ်ချက်ပါပဲလား"
" အမှုဆောင်အရာရှိချုပ်က အဲဒီလိုပြောလိုက်တော့ ရွှေပွဲလာတွေ တသောသောရယ်မောကြတာပေါ့၊
ပြီးတော့ အမှုဆောင်အရာရှိချုပ်သွားရာနောက်ကို အတူ လိုက်ပါလမ်းလျှောက်သွားကြပါတယ်"
" မိကျောင်းကန်ထဲ ရေကူးရဲဖို့ဆိုတာ တကယ်တော့ မလွယ်ဘူး"
" အဲဒီအချိန်မှာဘဲ ဘွမ်း ဆိုတဲ့ ရေကန်ထဲကို တစ်ခုခုကျသံ ထွက်ပေါ်လာပါတယ်။
ဧည့်ပရိသတ်တွေလဲ အသံကြားရာဘက်ကို လှည့်ကြည့်တယ်။
မြင်တွေ့ရတာကတော့ ဘဏ္ဍာရေးအရာရှိက ရေထဲမှာ ရေကူးနေတာ"
" တကယ်သတ္တိခဲပဲဟေ့"
" ဘဏ္ဍာရေးအရာရှိဟာ မိကျောင်းတွေကို ဘယ်ကတိမ်းလိုက် ညာက ရှောင်လိုက် နဲ့
ရေကူးကန်တစ်ဘက်ကမ်းကိုကူးခတ်သွားတယ်။
ရေကန်တစ်ဘက်စွန်းကိုရောက်တော့ ကမ်းနဖူးပေါ်ကို တွယ်တက်လိုက်တယ်။
အဲဒီအခိုက်အတန့်လေးမှာ မိကျောင်းကြီးတစ်ကောင်က ပါးစပ်နဲ့ လှမ်းဟပ်လိုက်တာ
သူ့ရှူးဖိနပ်တစ်ဘက်ပါသွားတယ်တဲ့"
" အသည်းယားလိုက်တာကွာ"
" အံ့အားသင့်ပြီး မျက်လုံးပြူးသွားတဲ့ အမှုဆောင်အရာရှိချုပ်ဟာ ဘဏ္ဍာရေးအရာရှိ အပါးကို
ချဥ်းကပ်သွားပြီး ခင်ဗျားကတော့ တကယ့်ကို ရင်သပ်ရှုမော အံ့သြစရာကောင်းတဲ့လူပါပဲဗျာ။
ကျွန်တော့တစ်သက်မှာ ခင်ဗျားလောက် သတ္တိကောင်းတဲ့သူ မတွေ့ဖူးသေးပါဘူး။
ခင်ှေားရဲ့ ရဲစွမ်းသတ္တိဟာ တိုင်းတာလို့မရနိုင်အောင် ကြီးမားပေတယ်။
ခင်ဗျား ဘာဖြစ်ချင်သလဲ။ ကျွန်တော်ကတော့ ချီးမြှင့်ဖို့အဆင်သင့်ပဲလို့ပြောတယ်"
" ရဲစွမ်းသတ္တိနဲ့ ထိုက်တန်ပါပေတယ်"
" ရေကန်ထဲက တက်လာတဲ့ ဘဏ္ဍာရေးမှူးက အသက်ကို ဖုတ်လိုက်ဖုတ်လိုက် ရှူရင်း ဟိုဟိုဒီဒီကြည့်တယ်။
ပြီးတော့ မေးခွန်းတစ်ခုမေးတယ်"
" ဘာမေးတာလဲ"
" မေးခွန်းကတော့ ကျွန်တော့ကို ရေကန်ထဲတွန်းချတာ ဘယ်သူလဲတဲ့ "
ဖေလင်းသစ်
...................။...................
Ref: မော်ဒန်သတင်းဂျာနယ်၊ ၁၂ နိုဝင်ဘာလ ၂၀၁၀ စာမျက်နှာ(၂၀-၂၁)
Thursday, 11 November 2010
မိကျောင်းကန်
Subscribe to:
Post Comments (Atom)
;)
ReplyDelete