၇၈၂။ အလွန်ကြုံလှီ၍ နံရိုးပြိုင်းပြိုင်းထွက်သော အချင်းပြိတ္တာတို့ သင်တို့သည် အ၀တ်လည်းမပါ၊ စက်ဆုပ်ရွံရှာဖွယ်အဆင်းသဏ္ဌာန်လည်း ရှိကုန်၏၊ ကြုံလှီ၍ အကြောပြိုင်းပြိုင်းထသော ကိုယ်ရှိကုန်လျက် ဤအရပ် တည်နေသော သင်တို့ကား အဘယ်သူတို့ ဖြစ်ကုန်သနည်း (ဟု အသျှင်မဟာမောဂ္ဂလ္လာန်က မေး၏)။
၇၈၃။ အရှင်ဘုရား အကျွန်ုပ်တို့သည် ယမမင်းနိုင်ငံ ပြိတ္တာဘုံ၌ အကျုံးဝင်သော မကောင်းသော လားရာရှိသော ပြိတ္တာတို့ဖြစ်ပါကုန်၏၊ အကျွနုပ်တို့သည် မကောင်းမူကံကို ပြုခဲ့မိတုန်သောကြောင့် ဤလူ့ဘုံမှ ပြိတ္တာဘုံသို့ ရောက်ကြပါကုန်၏ (ဟု ပြိတ္တာများက ဖြေ၏)။
၇၈၄။ အချင်းတို့ သင်တို့သည် ကိုယ်ဖြင့်၎င်း နူတ်ဖြင့်၎င်း စိတ်ဖြင့်၎င်း အဘယ်မကောင်းမူကံကို ပြုခဲ့ကြကုန်သနည်း၊ အဘယ်မကောင်းမူကံ၏ အကျိုးအားဖြင့် ဤလူ့ပြည်မှ ပြိတ္တာဘုံသို့ ရောက်ကြရကုန်သနည်း (ဟု အသျှင်မဟာမောဂ္ဂလ္လာန်က မေး၏)။
၇၈၅။ (အရှင်ဘုရား) အကျွန်ုပ်တို့သည် မည်သူကမျှ အပိတ်အပင်မရှိသော ရေချိုးဆိပ်တို့၌ လူတို့မေ့လျော့ကျန်ရစ်ခဲ့သော ပဲဝက်မျှဥစ္စာကိုလည်း (ရလို့ရငြား) ရှာမှီးခဲ့ပါကုန်၏၊ အကျွန်ုပ်တို့သည် လှူဖွယ်ဝတ္ထုတို့ ရှိပါကုန်သော်လည်း မိမိ၏မှီခိုရာ ကိုင်းကျွန်းသဖွယ်ဖြစ်သော ဒါနကို မပြုလုပ်ခဲ့ပါကုန်။
၇၈၆။ အရှင်ဘုရား အကျွန်ုပ်တို့သည် ရေမွတ်သိပ်လှကုန်သည်ဖြစ်၍ မြစ်သို့ ကပ်ရောက်ပါကုန်၏၊ ယင်းသို့ ကပ်ရောက်မိကြကုန်သော် စီးနေသော မြစ်သည် ရေမရှိပဲ အချည်းနှီးဖြစ်သွားပါ၏၊ ပူသောအချိန်ကာလတို့၌ အရိပ်ရှိရာသို့ ချဉ်းကပ်ကြပါကုန်၏၊ ယင်းသို့ ချဉ်းကပ်မိကုန်သည်ရှိသော် အရိပ်တည်ရာအရပ်သည် နေပူဖြစ်သွားပါ၏။
၇၈၇။ အကျွန်ုပ်တို့အား လေသည် အတွေ့အားဖြင့် မိးကဲ့သို့ ပူလောင်သည်ဖြစ်၍ တိုက်ခတ်ပါ၏၊ အရှင်ဘုရား ဤဆိုအပ်ပြီးသော ဆင်းရဲကို၎င်း ထိုဆင်းရဲထက် ရုန့်ရင်းကြမ်းတမ်းသော အခြားဆင်းရဲကို၎င်း (မကာင်းမူပြုခဲ့သော အကျွန်ုပ်တို့သည်) ခံစားထိုက်ပါကုန်၏။
၇၈၈။ အကျွန်ုပ်တို့သည် ဆာလောင်ကုန်သည်ဖြစ်၍ စားသောက်ဖွယ်အာဟာရ၌ မက်မောကုန်လျက် ယူဇနာများစွာတိုင်အောင်လည်း သွားရောက်ကြပါကုန်၏၊ ဤသို့ သွားရောက်ကြပါကုန်သော်လည်း အာဟာရတစုံတရာကို မရကြကုန်ပဲသာလျှင် ပြန်ခဲ့ရပါကုန်၏၊ အကျွန်ုပ်တို့၏ ဘုန်းကံနည်းသော အဖြစ်သည် အံ့သြဖွယ်ရှိလှပါ၏။
၇၈၉။ အရှင်ဘုရား အကျွန်ုပ်တို့သည် ဆာလောင်ကုန်သည်ဖြစ်၍ ဆာလောင်ခြင်းဖြင့် မူးမိူင်တွေဝေကုန်သည်ဖြစ်ရကား တုန်လူပ်ကုန်လျက် မြေ၌ လဲကျကြရပါကုန်၏၊ တရံတခါ ပက်လက်လဲကျကုန်၍ တရံတခါ မှောက်ခုံလဲကျပါကုန်၏။
၇၉၀။ ထိုအကျွန်ုပ်တို့သည် ထိုရောက်ရာအရပ်ဝယ် မြေ၌ ပုတ်ခတ်အပ်ကုန်သကဲ့သို့ လဲကျကြရပါကုန်၏၊ ရင်ဝကို၎င်း ဦးခေါင်း(နဖူး)ကို၎င်း ထိခိုက်ကြပါကုန်၏၊ အကျွန်ုပ်တို့၏ ဘုန်းကံနည်းသော အဖြစ်သည် အံ့သြဖွယ်ရှိလှပါ၏။
၇၉၁။ အရှင်ဘုရား အကျွန်ုပ်တို့သည် ဤဆိုအပ်ပြီးသော ဆင်းရဲကို၎င်း ထိုဆင်းရဲထက် ရုန့်ရင်းကြမ်းတမ်းသော အခြားဆင်းရဲကို၎င်း ခံစားထိုက်ကြပါကုန်၏၊ အကျွန်ုပ်တို့သည် လှူဖွယ်ဝတ္ထုတို့ရှိပါကုန်လျက် မိမိ၏ မှီခိုရာ ကိုင်းကျွန်းသဖွယ်ဖြစ်သော ကောင်းမူကို မပြုခဲ့မိကြပါကုန်။
၇၉၂။ ထိုအကျွန်ုပ်တို့သည် ဤပြိတ္တာဘ၀မှ သွားရောက်၍ လူ့ဘ၀ကို ရကြပါကုန်သော် အလှူခံတို့စကားကို သိကုန်သည်ဖြစ်၍ သီလနှင့်ပြည့်စုံကာ များစွာသော ကုသိုလ်ကံကို ပြုကြပါကုန်အံ့ (ဟု ပြိတ္တာများက လျှောက်၏)။
မှတ်ချက်။ ။ ပြည်ထောင်စု မြန်မာနိုင်ငံတော် အစိုးရ သာသနာရေးဝန်ကြီးဌာန ဆဋ္ဌသံဂါယနာတင် ပိဋကတ်တော် စာအုပ်မှ ထုတ်နုတ်ဖော်ပြထားသည်။
No comments:
Post a Comment