သုဝဏ္ဏဘူမိနိုင်ငံ၏ အချက်အချာဒေသမှာ သထုံခရိုင် ဘီးလင်းမြို့နယ် ကေလာသတောင်တ၀ိုက် ဖြစ်သည်။ မွန်လူမျိုးတို့ အခြေစိုက်၍ မြို့ပြထီးနန်း တည်ထောင်ခဲ့ကြသည်။ ယင်းဒေသသည် ပင်လယ်ဆိပ်ကမ်းတစ်ခု ဖြစ်သည်။ မုတ္တမတောင်တန်း၏ အနောက်ဘက် လွင်ပြင်မှာ ရှေးယခင်က ပင်လယ်လွှမ်းနေခဲ့သည်။ ထိုစဉ်က ပင်လယ်ကမ်းစပ်သည် ယခုအရက်သည် မ(တိုက်ကလး)ရွာ ဖြစ်သော ကေလာသတောင်ခြေအထိ ရောက်ရှိခဲ့သည်။ အရက်သည်မရွာနျင့် သထုံမြို့နေရာတို့မှ လေး၊ မြှားများ၊ ကျောက်ကြိုများ၊ နိုင်ငံခြားသင်္ဘောများ၏ အပိုင်းအစများကို တူးဖော်တွေ့ရှိခဲ့သည်။
သုဝဏ္ဏဘူမိသည် မွန်တို့၏ ဌာနဖြစ်သော ရာမညတိုင်း ဖြစ်သည်။ ရှေးယခင်က သုဝဏ္ဏဘူမိသည် စစ်တောင်းမြစ်နှင့် သံလွင်မြစ်နှစ်သွယ်ကြား ဒေသဖြစ်သည်။ လွန်ခဲ့သော ဘီစီ ၂၀၀၀-ကျော်လောက် အချိန်က မွန်ခမာအနွယ်ဝင်တို့သည် အရှေ့တောင် အာရှ မြစ်ဝှမ်းဒေသများသို့ တစတစ ပြောင်းရွှေ့လာကြသည်။ မြစ်နီမြစ်ဝကျွန်းပေါ်၊ မဲခေါင်မြစ်ဝကျွန်းပေါ်၊ စစ်တောင်း သံလွင်၊ ဂျိုင်း မြစ်ဝကျွန်းပေါ်ဒေသတို့တွင် ပျံ့နှံ့နေထိုင်ခဲ့ကြသည်။ ဧရာဝတီမြစ်ဝကျွန်းပေါ်ထိ ကျယ်ပြန့်သည် မွန်ခမာ၊ အနွယ်ဝင် အချို့သည် ဗြဟ္မပုတ္တရမြစ်ဝှမ်းနှင့် ဂင်္ဂါမြစ်ဝှမ်းဒေသများသို့လည်း ရောက်ခဲ့ကြသည်။
မွန်လူမျိုးတို့သည် ဘီစီ ၁၇-ရာစုအတွင်းက သုဝဏ္ဏဘူမိကို တည်ထောင်ခဲ့ကြသည်။ အိန္ဒိယကုန်သည်များနှင့် စွန့်စားသူများ ရောင်းဝယ် ဖောက်ကားကြသဖြင့် သုဝဏ္ဏဘူမိဒေသသည် လွန်စွာ ကြွယ်ဝချမ်းသာခဲ့သည်။ ထိုအချိန်က သုဝဏ္ဏဘူမိသည် ရာမညတိုင်းကြီးအဖြစ် ကျယ်ပြန့်သည်။ ပုသိမ် ၃၂-မြို့၊ ဒလ-၃၂မြို့ ပိုင်းခြား၍ အုပ်ချုပ်ကြသည်။ ရွှေ ဆင်စွယ် ပျားရည်တို့ ထွက်၍ သုဝဏ္ဏဘူမိ ရွှေမြေဟု ခေါ်တွင်ခဲ့ကြသည်။ ပင်လယ်ရပ်ခြားနိုင်ငံတို့နှင့် ကုန်သွယ်မူ ပြုရုံသာမက သုဝဏ္ဏဘူမိမှ တနင်္သာရီ ရိုးမကို ဖြတ်ကျော်၍ အရှေ့ဘက်ရှိ နိုင်ငံများနှင့်လည်း ကုန်းလမ်းခရီးဖြင့် ကုန်သွယ်ခဲ့သည်။ အိန္ဒိယနိုင်ငံနှင့် ပင်လယ်ရေကြောင်း အဆက်အသွယ်ကောင်းသည်။
ဂင်္ဂါလွင်ပြင်သို့ ရောက်ရှိသွားသော မွန်ခမာအနွယ်ဝင်တို့နှင့် ဆက်သွယ်၍ ကုန်းကြောင်းခရီး ကုန်ရောင်းကုန်ဝယ် သွားကြသည်။ အိန္ဒိယတောင်ပိုင်း ကလိင်္ဂတိုင်း၊ တေလင်္ဂဏတိုင်း အရပ်ဒေသတို့မှ တိလင်္ဂဏလူမျိုးတို့လည်း စစ်မက်ရေးကြောင့် ပြေးဝင်လာကြပြီး ဒဂုံဒေသတွင် နေထိုင်လာကြသည်။ မွန်ခမာအနွယ်ဝင်ချင်း ဖြစ်ကြသဖြင့် မကြာခင်မျာပင် ရောနှောသွားကြသည်။ မွန်ရှေးဟောင်း ကလေးချော့ သီချင်းအရ အိန္ဒိယတောင်ပိုင်းမှ ၀င်ရောက်လာသူတို့သည် ဒဂုံဒေသကို ဥက္ကလာ(ဥက္ကလာပ)ဟု အမည် သမုတ်ကြသည်။ အမည်များမှာလည်း ပါဠိ သက္ကတအမည်များ ဖြစ်ကြသည်။ မိမိတို့နေရင်းဒေသ ဂင်္ဂါလွင်ပြင်သို့ ရာသီဥတုသာယာသော အချိန်တွင် လှည်းများဖြင့် ကုန်ကူးသန်းရောင်းဝယ် သွားလာကြသည်။ အိန္ဒိယနှင့် သုဝဏ္ဏဘူမိ ကုန်းလမ်း ဆက်သွယ်ရေးသည် ဘီစီ ၆-ရာစု မတိုင်မီကပင် ရှိနေလိမ့်မည်ဟု ဆိုကြသည်။
ပြည်ထောင်စု မြန်မာနိုင်ငံတော်အစိုးရ သာသနာရေးဝန်ကြီးဌာန ဗုဒ္ဓဘာသာတရားတော် (အထက်တန်းအဆင့်) စာအုပ်မှ ထုတ်နူတ်ဖော်ပြသည်။
No comments:
Post a Comment