မြတ်စွာဘုရားသည် သာဝတ္ထိပြည် ဇေတ၀န်ကျောင်းတော်၌ သီတင်းသုံးနေတော်မူစဉ် ဝေဠုကဏ္ဍတီမြို့သူ နန္ဒမာတာ ဥပါသိကာ ဒါယိကာမက အဂ္ဂသာဝကနှစ်ပါး သံဃာတော်တို့အား အင်္ဂါခြောက်ပါးနှင့် ပြည့်စုံသော အလှူကြီးပေးလှူနေသည်ကို ဒိဗ္ဗစက္ခုအဘိညာဉ်ဖြင့် မြင်တော်မူ၍ အကျိုးကြီးသော ဒါနအကြောင်းကို ဟောပြတော်မူခဲ့သည်။
အကျိုးကြီးသော ဒါန၏ အင်္ဂါရပ်များမှာ -
(၁) မလှူမီ ရှေ့အဖို့က ကြိုတင်ဝမ်းမြောက်ခြင်း၊
(၂) လှူဆဲအခါမှာ စိတ်စေတနာကောင်းစွာ ကြည်လင်ခြင်း၊
(၃) လှူဒါန်းပြီးနောက် နှစ်သက်ဝမ်းမြောက်သောစိတ်ရှိခြင်း -
ဟူသော အလှူရှင်ဘက်က အင်္ဂါ(၃)ပါးနှင့်ပြည့်စုံခြင်း။
(၄) ရာဂကင်းပြီးသူ (သို့မဟုတ်) ရာဂကင်းရန် ကျင့်ကြံအားထုတ်နေသူ ဖြစ်ခြင်း၊
(၅) ဒေါသကင်းပြီးသူ (သို့မဟုတ်) ဒေါသကင်းရန် ကျင့်ကြံအားထုတ်နသေူ ဖြစ်ခြင်း၊
(၆) မောဟကင်းပြီးသူ (သို့မဟုတ်) မောဟကင်းရန် ကျင့်ကြံအားထုတ်နေသူဖြစ်ခြင်း -
ဟူသော အလှူခံဘက်က အင်္ဂါသုံးပါးနှင့် ပြည့်စုံခြင်း၊
ဤအင်္ဂါခြောက်ပါးနှင့် ပြည့်စုံသောအလှူကို အတိုင်းမသိ အကျိုးပေးခြင်း ရှိသည့် အကျိုးကြိးသော ဒါနဟူ၍ ဟောတော်မူ၏။ ဤအင်္ဂါခြောက်ပါးတွင် တစ်ပါးပါးယုတ်လျော့နေလျှင် အကျိုးပေးအာနုဘော် ဆုတ်ယုတ်သဖြင့် အကျိုးနည်းသော ဒါနဟု ဟောတော်မူသည်။
ထို့အပြင် အောက်ပါ အင်္ဂါလေးပါးနှင့် ညီညွတ်သော အလှူဒါနသည် ချက်ချင်းအကျိုးပေးတတ်သဖြင့် အကျိုးကြီးသော ဒါနဖြစ်သည်။ ၎င်းအင်္ဂါလေးပါးမှာ -
(၁) လှူဖွယ်ဝတ္ထုပစ္စည်းက တရားသဖြင့် ရှာဖွေရရှိထားသည့် ဓမ္မိယလဒ္ဓပစ္စည်းဖြစ်ခြင်း၊
(၂) လှူဒါန်းသူသည် သဒ္ဓါတရား ထက်ထက်သန်သန် စေတနာသုံးတန် ညီညွတ်၍ လှူဒါန်းခြင်း၊
(၃) အလှူခံပုဂ္ဂိုလ်က ရဟန္တာ(သို့မဟုတ်) အနာဂါမ် ပုဂ္ဂိုလ်ဖြစ်ခြင်း၊
(၄) ထိုအလှူခံပုဂ္ဂိုလ်သည် နိရောဓသမာပတ်မှ ထပြီးစဖြစ်ခြင်း -
တို့ဖြစ်ကြသည်။
ဤအင်္ဂါလေးပါးနှင့် ပြည့်စုံသော အလှူဒါနသည် ပုဏ္ဏသူဋ္ဌေး၊ ကာက၀လိယသူဋ္ဌေး၊ သုမနပန်းသည် စသည်တို့ကဲ့သို့ ယခုဘ၀မှာပင် ချက်ချင်း အကျိုးပေးသောကြောင့် အကျိုးကြီးသော ဒါနမည်၏။ ဤအင်္ဂါလေးပါးတွင် တစ်ပါးပါးယုတ်လျော့နေလျှင် အကျိုးပေးအာနုဘော် ဆုတ်ယုတ်သဖြင့် အကျိုးနည်းသော ဒါနမည်၏။
ထို့အပြင်လည်း အောက်ပါ အင်္ဂါငါးပါးနှင့် ပြည့်စုံသော အလှူဒါနသည် အကျိုးကြီးသော ဒါနဖြစ်သည်။ ၎င်းအင်္ဂါငါးပါးမှာ -
(၁) အလှူ ဒါယကာ သီလရှိ၍ ကာင်းသော ကိုယ်ကျင့်တရားနှင့် ပြည့်စုံသူဖြစ်ခြင်း၊
(၂) အလှူခံပုဂ္ဂိုလ်ကလည်း သီလရှိ၍ ကောင်းသော ကိုယ်ကျင့်တရားနှင့် ပြည့်စုံသူဖြစ်ခြင်း၊
(၃) လှူဖွယ်ဝတ္ထုကလည်း တရားသဖြင့် ရှာမှီး၍ ရအပ်သည့် ဓမ္မိယလဒ္ဓပစ္စည်းဖြစ်ခြင်း၊
(၄) ပေးလှူသူသည် စေတနာသုံးတန် ထက်သန်ခြင်း၊
(၅) ကံ ကံ၏အကျိုးကို ယုံကြည်မူသဒ္ဓါတရားနှင့် ပြည့်စုံခြင်း -
တို့ဖြစ်ကြသည်။
ဤအင်္ဂါငါးပါးနှင့် ပြည်စုံသော ဒါနသည် ဘ၀သံသရာ တလျှောက်၌ ဘောဂသမ္ပတ္တိများကို ပေးဆောင်နိုင်သဖြင့် အကျိုးကြီးသော ဒါနမည်၏။
ဤအင်္ဂါငါးပါးတွင် တစ်ပါးပါးယုတ်လျော့နေလျှင် အကျိုးပေး အာနုဘော် ဆုတ်ယုတ်သဖြင့် အကျိုးနည်းသော ဒါနမည်၏။
Tuesday 4 January 2011
အကျိုးကြီးသော ဒါနနှင့် အကျိုးနည်းသော ဒါန
အမျိုးအစား/ကဏ္ဍ
အလှူဒါနဆိုင်ရာသိမှတ်ဖွယ်များ
Subscribe to:
Post Comments (Atom)
No comments:
Post a Comment