၃၄၁။ ရှေးအခါက အိမ်သို့ ကပ်လျက် ကာယ၀ိညတ်ဖြင့် ရပ်တည်၍ အတောင်းခံရသော အကျွန်ုပ်သည် ကိလေသာကို နှင်ထုတ်ပြီးသော (ပစ္စေကဗုဒ္ဓါ) ရဟန်းအား ချည်ကို ပေးလှူခဲ့ရပါ၏၊ ထိုအလှူ၏ ပြန့်ပြောများမြတ်သော ပွါးစီးမူရှိသော အကျိုးကို ယခုရပါ၏၊ အကျွန်ုပ်အား များစွာသော အကုဋေမျှလောက်သော အ၀တ်တို့သည် ဖြစ်ပါကုန်၏။
၃၄၂။ များစွာ ဆန်းကြယ်လျက် ယောက်ျားမိန်းမတို့ မှီဝဲအပ်သော ဗိမာန်သည် ပန်းတို့ဖြင့် ပြွမ်းသည်ဖြစ်၍ မွေ့လျော်ဖွယ်ရှိပါ၏၊ အကျွန်ုပ်သည် ထိုဗိမာန်ကို သုံးဆောင်လည်း သုံးဆောင်ရပါ၏၊ ထိုအကုဋေမျှလောက်သော အ၀တ်တို့တွင် အလိုရှိရာအ၀တ်ကို ၀တ်ရုံလည်း ၀တ်ရုံပါ၏၊ များစွာသော စည်းစိမ်ဥစ္စာလည်း ရှိပါ၏၊ ထိုစည်းစိမ်ဥစ္စာသည် ကုန်ခန်းလည်း မကုန်ခန်းနိုင်ပါ။
၃၄၃။ ထိုချည်လှူဒါန်းခဲ့သော ကံကို အစွဲပြု၍ ဤဗိမာန်၌ အကျိုးဖြစ်သော ချမ်းသာကို၎င်း သာယာခြင်းကို၎င်း ရအပ်ပါ၏၊ ထိုအကျွန်ုပ်သည် တဖန် လူ့ပြည်သို့ သွား၍ မကောင်းမူကုသိုလ်ကို ပြုပါအံ့၊ အရှင့်သား အကျွန်ုပ်ကို လူ့ပြည်သို့ ပို့ဆောင်ပါလော့ (ဟု မိန်းမ-က ပြော၏)။
၃၄၄။ သင်သည် အနှစ်ခုနှစ်ရာ အထက်ကပင် ဤဗိမာန်သို့ ရောက်လာ၏၊ ထိုလူ့ပြည်၌ အိုခြင်းသည်၎င်း၊ အသက်ကြီးခြင်းသည်၎င်း ဖြစ်ရလိမ့်မည်၊ သင်၏ ဆွေမျိုး အားလုံးတို့သည် သေကုန်ကြပြီဖြစ်ရကား ဤဗိမာန်မှ ထိုလူ့ပြည်သို့ သွား၍ အဘယ်ပြုလတ္တံ့နည်း (ဟု ပြိတ္တာ-က ပြော၏)။
၃၄၅။ အရှင် ဤနတ်ပြည်သို့ ရောက်လာ၍ နတ်ချမ်းသာနှင့် ပြည့်စုံသော အကျွန်ုပ်အား ခုနှစ်နှစ်မျှလောက်သာ ရှိပါသေး၏ဟု ထင်မိပါ၏၊ ထိုအကျွန်ုပ်သည် တဖန် လူ့ပြည်သို့ သွား၍ ကောင်းမူတို့ကို ပြုပါအံ့၊ အရှင့်သား အကျွန်ုပ်ကို လူ့ပြည်သို့ပို့ဆောင်ပါလော့ (ဟု မိန်းမ-က ပြော၏)။
၃၄၆။ ထိုဝိမာနပြိတ္တာသည် ထိုမိန်းမ၏ လက်မောင်းကို ဖိနှိပ်ဘိသကဲ့သို့ ကိုင်ပြီးလျှင် အလွန်အားနည်းသော မိန်းမအိုကြီးကို (မွေးဖွားရာအရပ်သို့) ပြန်လည်ပို့ဆောင်ပြီးလျှင် ဤအရပ်သို့ ရောက်လာသော လူအပေါင်းကိုလည်း သင်တို့သည် ကုသိုလ်ကောင်းမူကို ပြုကြကုန်လော့၊ ဤသို့ပြုသည်ရှိသော် ချမ်းသာသုခကို ရနိုင်၏ဟု ပြောကြားပါလေလော့ (ဟု ပြိတ္တာ-က မှာထား ပြောဆို၏)။
၃၄၇။ ကုသိုလ်ကောင်းမူကံကို မပြုခြင်းကြောင့် ဆင်းရဲပင်ပန်းခြင်းသို့ ရောက်သော ပြိတ္တာတို့ကို၎င်း ကုသိုလ်ကောင်းမူကံကို မပြုခြင်းကြောင့် ဆင်းရဲပင်ပန်းခြင်းသို့ ရောက်သော လူတို့ကို၎င်း ငါမြင်ရ၏၊ ကောင်းကျိုးချမ်းသာကို ဖြစ်စေတတ်သော ကုသိုလ်ကံကိုပြု၍ ချမ်းသာသုခ၌ တည်သော နတ်လူသတ္တ၀ါတို့ကိုလည်း ငါမြင်ရ၏ (ဟု မိန်းမ-က ဆုံးမစကား ပြောကြား၏)။
မှတ်ချက်။ ။ ပြည်ထောင်စု မြန်မာနိုင်ငံတော် အစိုးရ သာသနာရေးဝန်ကြီးဌာန ဆဋ္ဌသံဂါယနာတင် ပိဋကတ်တော် စာအုပ်မှ ထုတ်နုတ်ဖော်ပြထားသည်။
No comments:
Post a Comment